想過二人世界、追求私人空間，或者屋企要裝修？月租酒店都係一個唔錯嘅選擇，除咗有酒店式嘅服務，租期相對有彈性，唔駛按金上期，仲可以趁呢段同居時間，睇清楚M佬究竟嫁唔嫁得過！今次我哋嚟到位於佐敦嘅香港彩鴻酒店，無論月租定日租Staycation都夠晒經濟實惠，加上位處市中心，真係去邊都夠晒方便。
酒店大堂
香港彩鴻酒店位於佐敦，樓高15層，提供126間客房。酒店距離佐敦港鐵站約5分鐘步程，而喺彌敦道亦有多條巴士路線選擇。酒店位於內街，靜中帶旺，無論去廟街、尖沙咀柏麗大道定油麻地都夠晒方便。
房型種類
酒店分為兩種房型，分別係豪華房（大床房或雙床房）同尊貴房（大床房）。兩者嘅主要分別係房間嘅面積同樓層。今次睇呢個月租Hotel tour就發現高層房間可以遠眺港島區，視野夠晒開揚。
客房區域
今次我哋入住尊貴房，以呢個價錢同佐敦嘅鬧市嚟講，空間感算係十足，房間設有兩個衣櫃，有足夠位置畀住客放行李。
床就係標準嘅King Size，可以三邊落床，床單軟綿舒服，而枕頭總共有4個，2個軟2個硬。床嘅兩邊都有床頭櫃同閱讀燈，仲有插頭同USB充電位，臨瞓前可以睇吓書或者㩒電話。另外，由於酒店位處內街，加上房間遮光度一流，喺度瞓覺非常舒服。
但令我哋最欣賞嘅係有一張闊落嘅工作枱，無論食嘢、放嘢定係做嘢都夠晒方便。
電視除咗提供本地免費頻道之外，都有提供衛星電視選擇，兩個人坐喺度睇吓電視，呢啲咪就係簡單嘅幸福感囉。另外，房間亦有提供免費wifi，速度都算穩定，咁月租嘅朋友連上網錢都可以慳番啦！